Gaur egun, XX. mendearen amaieran eta iragan hurbilean pentsatu zitekeenaren aldean, MUSEOA, gizakiaren sormen artistiko plastikoaren adierazgarri anitzak -aldioro eta lekuoro- bildu, erakutsi, alderatu, kritikatu, gozatu eta birsortzeko irudikatutako espazioa, ariketa gisara, sormen arkitektonikoaren mami bihurtzen da.Erakusketa honekin hasten da ARTELEKU eta Donostiako Arkitektura Eskolaren arteko lankidetza. Berau Eskolako azken zikloan dauden ikasleek -MUSEOAREN gaiaren inguruan- burututako Proiektuen adierazgarri honekin zabaldu izana, halabehar pozgarria izateaz gain, zentro bien iharduera kreatiboen topagune bikaina ere bada.
